Leerent däi Maurmerlandjer poolitikkers fan disser feeler

Däi Oostfräisland-Flâağ, wel kent hum näit? Däi flâağ, mit of sünner wóópen, süğt man in ‘n büelt tuunen. Däi Oostfräisk Landskup het sülst ‘n äigen wersjoon mit höör Landskupswóópen, up däi in d’ middent däi Upstalsboom ofbild’t is. Däi histoorje fan ‘t Gróófenwóópen un fan ‘t Landskupswóópen gaajt weeruem nóó ‘t 17. äiw. Däi klöören swaart-rood-blaau kooment amäen fan ‘t 19. äiw. Däi oostfräisk flâağ höört unnerwiilst net soo tau Oostfräisland as booseln, däi Noordsäj un däi oostfräisk tóól.

1957 wur däi oostfräisk dreiklööer swaart-rood-blaau fan ‘t landsreegäären befastiğt (NLA AU Dep. 1 N Nr. 3476), soo dat siitdeem ook amten däi oostfräisk flâağ bii offisjäel baudels hiisen köönent. Däi oostfräisk flâağ is düs kiin feräinsflâağ, man ‘n offisjäel flâağ.

1998 róótiifiisäärde ‘t bundsreegäären däi róómkuntrakt tau ‘t beskiirmen fan nóósjoonóóel minnerhaiden. Siit däi tiid bünt däi Fräisen, Daansken, Sorbsken, un Sinten/Roomós fan ‘t bundsreegäären as ‘n nóósjoonóóel minnerhaid ankent. Us is näit bekent, dat artikkel 5 fan d’ róómkuntrakt fan d’ Maurmerlandjer kultürkummisjoon beacht’t wur. Äien maut in disser kuntekst fróógen, woo fööl küen däi poolitikkers d’r fan haarent. Wii dürent as börgers doch ferwachten un ferlangen, dat s’ us wetten kennent?

Rahmenübereinkommen, Art. 5, Abs. 1: Die Vertragsparteien verpflichten sich, die Bedingungen zu fördern, die es Angehörigen nationaler Minderheiten ermöglichen, ihre Kultur zu pflegen und weiterzuentwickeln und die wesentlichen Bestandteile ihrer Identität, nämlich ihre Religion, ihre Sprache, ihre Traditionen und ihr kulturelles Erbe, zu bewahren.

(Róómkuntrakt, artikkel 5, ofset 1: Däi kuntraktspertäjen ferfliitent sük, däi kundiisjes tau beföördern, däi ‘t leeden fan ‘n nóósjoonóóel minnerhaid möögelk móókent, höör kultüer tau pleegen un wiider tau undwikkeln un däi belangrîik paarten fan höör iidentitäit, nóómelk höör glôov, höör tóól, höör drağten un höör kultüräel aarvdaum, tau woren.)

Andochterğ däi histoorje, ‘t offisjäel ankennen un ‘t dóódelk ferwenden, kan man däi flâağ sünner twiivel as ‘n pâart fan d’ oostfräisk iidentitäit indäilen. Um disser feeler t’ berechtigen, hebbent wii ‘n Oostfräisland-Flâağ fööer ‘t Maurmerlandjer róódhuus uphangen. Wii köönent man hoopen, dat disser geneegen poolitikkers döör däi an ‘t ooverweegen brocht wordent un fan höör feeler leeren köönent. Un däi flâağ? Däi dürt däi gemäien föör d’ tauken geleegenhaid hollen.