1 Wekker oostfräisk flâağ is däi ‘räecht’ flâağ?

Däi oostfräisk dreiklööer is swaart-rood-blaau. Woosoo? Süü 2.

2 Is däi oostfräisk flâağ ‘n offisjäel flâağ?

Up ‘t landskupsfergóódern (fan d’ Oostfräisk Landskup) fan d’ deesembermóónd 1956 wur ‘n flaagen-paaregróóf föör ‘t ferfóóten fan d’ Oostfräisk Landskup annoomen, däi d’ oostfräisk klöören as offisjäel flâağ föör d’ Oostfräisk Landskup fastläegen dee. Dit bestemmen wur 1957 fan ‘t landsreegäären in Hanoover befastiğt (NLA AU Dep. 1 N Nr. 3476), soo dat siit däi tiid ook amten däi oostfräisk flâağ bii offisjäel anlóóten hiisen köönent. Däi flâağ höört siitdeem ook âal oostfräisk kumuunen (landkringen, mäinten usf.).

3 Dürent kumuunen däi flâağ mit ‘t wóópen (mit däi hoovdlingsslağten) hiisen?

Dat wóópen is wal oller as däi oostfräisk flâağ un däi oostfräisk flaagen mit ‘t wóópen wordent ook meer ferköft as däi flaagen sünner wóópen, man spiitelkerwîis het disser flâağ kiin offisjäel stóótus. Dat gift ook gemäinden, däi d’ oostfräisk dreiklööer mit ‘t gemäinwóópen hiisen daunt. Disser flaagen köönent ‘n offisjäel stóótus hebben, doo däi gemäinden höör as höör klöören annoomen hebbent.

4 Skrift dat leeğsaksk wóópenwet alleniğ däi lands-, bunds- un oiroopeesk flâağ fööer?

Nee, daajt ‘t näit. Dat leeğsaksk wóópenwet skrift fööer, woo d’ landsflâağ un ‘t landswóópen stalt’t weesen söölent. In däi uutförensbestemmens föör ‘t leeğsaksk wóópenwet find’t man unner 1.4: “Däi unner d’ uppaas fan ‘t land stóónd gebiitskörperskuppen […] fan ‘t oopenbor recht word’t anbefoolen, up däi fastläeğt dóóeğ höör amtssteeden ook t’ beflaagen.” Kumuunen dürent düs binnen ‘t wet sülst oover höör beflaagen beskikken, man daajt höör bloot undfeelen, sük an däi beflaagensdóóeğ t’ hollen.

5 Skrift däi bundsflaagenbeslus alleniğ däi lands-, bunds- un oiroopeesk flâağ fööer?

Däi bundsflaagenbeslus daajt sük bloot up róódhuusen, däi äigendaum fan d’ bund bünt, beluuken. Róódhuusen in ‘t äigendaum fan d’ kumûun daajt h’ näit róóken.

6 Wel daajt oover ‘t beflaagen besluuten?

Däi kumûun -> süü fróóeğ 4.

7 Woosoo hebbent (Oost)Fräisen ‘t recht up ‘t beflaagen?

Däi Fräisen bünt äin fan däi fär stóótelk un oiroopeesk ankent nóósjoonóóel minnerhaiden in Düütskland. Däi anner minnerhaiden bünt Daansken, Sorbsken un Sinten & Roomós. Däi róómkuntrakt tau ‘t beskiirmen fan nóósjoonóóel minnerhaiden kwam in d’ Bundsreepublik Düütskland up d’ 01.02.1998 in waark. Al in ‘t ‘föörskriivsel’ kan man leesen, dat ‘n deemookróótsk selskup paasend kundiisjes skeppen sul, däi “… däi äigen iidentitäit [fan däi minnerhaiden] antöönen …” (reesp. woren/wiiderundwikkeln) daunt.

8 Word’t däi oostfräisk flâağ al hiist?

In däi gemäien Iil hangt al ‘n Oostfräislandflâağ fööer ‘t róódhuus. In wat anner gemäinden diskuutäärt man in d’ gemäinróód noch oover d’ oostfräisk flâağ.